ӘЛЕУМЕТТІК ЖЕЛІЛЕРДЕГІ УНИВЕРСИТЕТ ИМИДЖІНІҢ ҚАЛЫПТАСУЫН ЖИ ҚҰРАЛДАРЫ АРҚЫЛЫ БАҒАЛАУ
0 0
Аңдатпа
Бұл мақалада 2022 жылдың басынан 2025 жылдың басына дейінгі кезеңде Қожа Ахмет Ясауи атындағы Халықаралық қазақ‑түрік университетінің әлеуметтік желілердегі (Instagram, Facebook, Twitter) жарияланымдарының университет имиджін қалыптастырудағы әсері жасанды интеллект (ЖИ) құралдары арқылы жан-жақты талданады.
Зерттеу барысында тілдік және визуалдық контенттің имиджге ықпалы, жарияланымдардың эмоционалдық бояуы (sentiment analysis), тақырыптық құрылымы (topic modeling) және визуалды мазмұнның танылуы (image recognition) секілді аспектілер қарастырылады. ЖИ негізіндегі табиғи тіл өңдеу (NLP), тақырыптық модельдеу, сезімдік талдау және суретті тану әдістері қолданыла отырып, әлеуметтік желілердегі контент жүйелі түрде сарапталған.
Зерттеу нәтижесінде университеттің цифрлық ақпарат кеңістігіндегі бейнесі, аудиториямен байланыс тәсілдері мен контент тиімділігі айқындалды. Мақалада алынған нәтижелерге сүйене отырып, университеттің цифрлық коммуникация стратегиясын жетілдіру бойынша нақты ұсыныстар беріледі. Бұл жұмыс жоғары оқу орындарының әлеуметтік желілердегі имиджін нығайтуға және ЖИ құралдарын тиімді пайдалануға бағытталған тәжірибелік негіз болып табылады.
Сонымен қатар, зерттеу барысында алынған деректер визуализацияланып, контент динамикасы мен аудиторияның реакциясы уақыт бойынша талданды. Ұсынылған әдістер әлеуметтік желі контентін бағалаудың инновациялық үлгісін қалыптастырады және университет брендін ілгерілетудің тиімді тетіктерін ұсынады.
